12 сәуір - Алаштың ардақты ұлы, ұлт жанашыры, ғұлама ғалым,қазақтың Қанышы Академик Қ.Сәтбаевтың туған күні. Осы айтулы оқиғаға байланысты біздің мектебімізде Қ.Сәтбаевтың 125 жылдық мерейтойын атап өту шараларының айлық жоспары түзіліп, мерейтойды кең көлемде атап өту ұйымдастырылып отыр.

«Мәңгі өшпес жарық жұлдыз» тақырыбындағы мерейтойлық іс- шаралар аясында Қ.Сәтбаевтың өмір жолы мен халық үшін қызметінен сыр шертіп, оқушыларға мол мағлұмат беру мақсатында көптеген жұмыстар жасалмаққа жоспарланған. Мектептің кіре берісіне және әр сынып бөлмесіне академик өмірінен сыр шертетін Қ.Сәтбаев бұрышы ұйымдастырылды, мерейтой эмблемасы көрнекті жерлерге ілінді. Оқушылардың назарына «Дара Қаныштың дара сөздері» және Қаныш туралы, оның сан салалы қызметі жайлы пікірлер ұсынылды. Мектеп музейінде «Өнегелі өмір» тақырыбында мұражай сабағы ұйымдастырылып оқушыларға «Ұлт мақтанышы – Қаныш Сәтбаевтың» халқының дамуы мен жастардың болашағы үшін жасаған елеулі қызметі жайлы сыр шертті.Әр сынып ғалымның өмір жолынан өнеге ала отырып қабырға газеттерін шығарды. 1-11 сыныптарда «Қазақтың Қанышы » деген атпен ғалымның өмірі мен шығармашылығын, еңбектерін насихаттау мақсатында «Қаныштану »онлайн сабақтары жүргізілді. «Қаныш жүріп өткен жолмен...» атты Қаныш Сәтбаевтың туған еліне онлайн ғылыми- танымдық экспедиция ұйымдастырылды. Бұл аптадағы жұмыстар «Мәңгілік жарық жұлдыз» тақырыбындағы салтанатты жиынмен қорытындыланды. Салтанатты жиынға ардагер ұстаздар, мектеп мұғалімдері мен оқушылары қатысты. Жиында сөз алған ардагер ұстаз Е.Досболов мектеп оқушыларына Академиктің атымен аталғанына 60 жыл толып отырған мектептің қашан да игі істердің басында жүргенін айта отырып, оқушыларға Қаныш аталарының ақыл парасатынан, ұлтжанды мінезінен үлгі алуға шақырды. Жиын соңы мектебіміздің 1976 жылғы туған түлектерінің 25 жылдық бас қосуларына орай мектебімізге сыйға тартқан Қ.Сәтбаев ескерткішіне гүл қоюмен қорытындыланды.